影評.賓虛

[劇評mode] 呀，係。睇左賓虛，講少少。 #個姓意頭好差XDDD #好彩個名叫尤大
我好鍾意舊果套，是有點失望的。同女友睇，佢未睇過舊果套，覺得呢套ok，不過太暴力。
網評一般 3.8-4.0 / 5.0。我會俾 3.8/5.0。
先講重要的驚喜。若你是香港人，會睇到好有感覺。劇中的猶大與羅馬關係、羅馬統治方式、百夫長的說話，根本就是香港今天一模一樣。

扣佢分的原因係佢從頭到尾都係為左鋪排賽馬果段著名戲。但斷估係電腦合成。其實對現代來說果段賽馬戲已經無以前咁震撼。最慘係我覺得佢賽馬同戰船兩段都係仲拍得差過以前無電腦合成既時候….佢段賽馬戲唔知做乜係咁影面浪費晒
以前的賓虛，有睇的人知道，劇中出現的耶穌係從來無面目的….當年對耶穌的尊崇仍然極高。呢方面唔會比較。不過呢套的耶穌唔係好吸引。
#劇透慎入 全套戲前半都 ok 的。我諗最敗筆係賽馬之後。前面明明仲係《賓虛》，鏡頭一轉就變左《耶穌傳》，我以為我入錯戲院（明明仲坐係度）；突然去左客西馬尼耶穌被出賣、苦路、然後各各他。同埋醫治果段，＆寬恕。呢段整體都係以前的賓虛好睇好多。斷估都係一尐保守派基督徒（或俗稱耶L）有參與劇本。
硬銷未睇過的人一定要睇舊果套。不過提提小心舊戲太長成三個幾鐘，我同過幾個朋友睇佢地都瞓晒。

最後，講下主旨。賓虛的故事，舊戲係講佢報左仇，都發覺無用，都係唔開心，失去晒一切。直到見到基督。反省了悟，重新踏上人生。
新呢套，係報左仇，然後就信耶穌悔改，仲要用耶穌勸對方唔報番仇，然後大團圓結局。
問題係邊？舊戲係講：「報仇無補於事」。新戲係講：「報仇＋仲要對方無仇報＋醫治埋＋有晒光環」先係叻仔。
我覺得主旨錯晒，係嚴重問題。亦都係我扣佢分的原因（3.8/5.0 淨係俾特技，劇情零分）不過都反映左現代基督徒的思考方式。
睇呢套戲就睇到現代基督教無論東方西方都已經變左的事實。